Bompengar

SV er for bompengar i byane som har som mål å redusere biltrafikken og finansiere kollektivtrafikk. Samstundes er vi sterkt imot den massive auka i bompengar som går til å byggje miljøfiendtlege motorvegar.

SV vil stoppe planane om nye, store motorvegar inn mot byane. I tillegg vil vi nedskalere mange av regjeringa sine planlagde firefelts vegar til 2/3-felts vegar der det er tilstrekkeleg. Vi vil flytte pengane frå miljøfiendtlege motorvegar til betre jernbane, kollektivtransport og tryggje og gode kvardagsvegar.

SV vil forsvare miljøtiltaka som skal få bort kø og forureining i byane våre. I Oslo, Bergen og Trondheim ser vi at bompengar er viktig for satsinga på kollektivtransport. Biltrafikken blir avgrensa og fleire tek kollektiv, sykkel og gange. Det gir reinare luft, ein trivelegare by og lågare klimagassutslepp.

SV vil

• Stoppe nye miljøfiendtlege motorvegprosjekter, og nedskalere planlagde firefelts vegar til 2/3-felts vegar med midtdelar der det er tilstrekkeleg.
• Forsvare bompengar som skal redusere kø og forureining, og som bidreg til heilt nødvendige miljø- og framkommelegheitstiltak. SV er for bomringane i mellom anna Oslo, Bergen og Trondheim. 
• Auke staten sin del av kollektivprosjekt i byane til 80 %, for å sikre at viktige kollektivprosjekt blir gjennomført og at folk får eit attraktivt alternativ til bilkøyring. 
• Ha vegprising i staden for bompengar i framtida, slik at vi kan få et meir sosialt treffsikkert system.
• At nye vegar i distriktet skal bli finansiert over skattesetelen, og at bruken av bompengar blir redusert med mindre det er lokal demokratisk forankring for bompengar.